Фотафакт: праваабаронца прыйшоў сустракаць вызваленых сёння ў цішотцы з Віталём Чопікам
16 верасня 2026 беларускі журналіст і праваабаронца Ігар Казмерчак ў Вільнюсе (Літва) менавіта ў такім выглядзе сустракаў 25 вызвалена-дэпартаваных палітвязняў.
На нашае пытанне, чаму ён вырашыў прыйсці ў цішотцы з выявай Віталя Чопіка, Казмерчак адказаў наступнае: — Мы атрымалі яшчэ 25 вызваленых, ў прынцыпе, гэта добра. Але нам нельга забывацца, што там яшчэ вельмі шмат людзей. Амаль тысяча прызнаных палітвязняў, шмат хто чакае свайго прызнання палітвязнем. Таму, калі мы можам нагадваць пра лёс гэтых арыштаваных, гэтых сядзельцаў — мы павінны гэта рабіць.
16.09.2026 вызвалілі (і адразу ж выслалі з уласнай краіны) 25 беларускіх палітычных зняволеных. Сярод іх аказаліся тры берасцейцы, але не Віталь Чопік.
Берасцеец Чопік працягвае заставацца за кратамі за сваю праваабарончую дзейнасць (яму далі 7 гадоў калоніі за тое, што хадзіў на палітычныя суды). Пакуль ён сядзіць, улады прымусова прадалі з аўкцыёна яго кватэру.