Навіны

Сілавікі зрабілі «пакаяннае відэа» з арганізатарам берасцейскіх вулічных гонак

Затрыманых трое, ім закідваюць «несанкцыянаванае масавае мерапрыемства», прайшлі суды
Выкарастаныя фота: злева Ўлад Качурка (здымак з сацсетак). Справа выява з unsplash.com
Днямі сілавікі пахваліліся затрыманнем арганізатараў вулічных гонак у Берасці. З адным з затрыманых вылажылі так званае «пакаяннае відэа».

Як вынайшла берасцейская «Вясна», на відэа Уладзіслаў Качурка. Хлопец у роліку кажа, што прыехаў [8 красавіка 2023] на машыне да вёскі Шчэбрын, пастаяў 15 хвілін, праз надвор'е мерапрыемства было адмененае і ён з'ехаў.

Па інфармацыі берасцейскай «Вясны», Качурку асудзілі 11 красавіка па ч.2 арт.24.23 КоАП (Арганізацыя несанкцыянаванага масавага мерапрыемства). Суд адбываўся ў судзе Берасцейскага раёну, суддзя Сяргей Маручак. Дакладны вынік суду невядомы, але ж хлопец, па нашых дадзеных, застаецца затрыманым.

Таксама 11 красавіка асудзілі яшчэ дзвюх хлопцаў. Ім закідвалі ч.1 арт.24.23 КоАП (Удзел у несанкцыянаваным масавым мерапрыемстве). Суддзёй ізноў быў Маручак. Дзмітрый Літвінчук і Руслан Курловіч, па нашых дадзеных, таксама пасля суду не выйшлі на волю.
Скрыншот часткі раскладу суду Берасцейскага раёну за 11 красавіка 2023
Гэтыя тры судовыя паседжанні суадносяцца з паведамленнем сілавікоў пра тое, што 8 красавіка яны затрымалі трох чалавек у сувязі з вулічнымі гонкамі. Усіх траіх, паводле сілавікоў, па стане на 12 красавіка трымалі ў ІЧУ.
Made on
Tilda