У вобласці толькі 2 з 16 сайтаў райвыканкамаў публікавалі паведамленні пра выбары* па-беларуску

Мы праверылі, наколькі дасяжнай з'яўляецца інфармацыя пра «Адзіны дзень галасавання» для беларускамоўных грамадзян. Вынікі сумныя.

З 16 сайтаў райвыканкамаў вобласці, толькі ў Століне зрабілі асобны падраздзел на сайце пра выбары*-2024. Для параўнання: усе 16 райвыканкамаў маюць асобныя старонкі пра выбары на расейскай мове.
Але ж радавацца за жыхароў Століну ранавата: з 5 публікацый у беларускамоўным раздзеле пра выбары, толькі 1 (адна) публікацыя насамрэч утрымлівае беларускамоўны тэкст (астатнія — тэкст па-расейску).

Скрыншот сайту беларускамоўнай версіі столінскага райвыканкаму, раздзел «Выбары-2024» станам на 21 лютага 2024, з пазнакамі берасцейскай «Вясны»

Яшчэ вылучым у пазітыўным сэнсе (на фоне астатніх) Лунінец: там не стваралі асобны раздзел пра выбары*-2024 на беларускай мове, але ж публікавалі некалькі (ад 2 да 5, у залежнасці ад таго што лічыць афіцыйнымі паведамленнямі на выбарчую тэматыку) паведамленняў па-беларуску ў раздзеле «навіны»:

Скрыншот сайту беларускамоўнай версіі лунінецкага райвыканкаму станам на 21 лютага 2024. Нажаль, гэта амаль усе паведамленні па-беларуску пра выбары* 2024 году, якія можна там знайсці

Але гэта ўсё роўна нельга параўноўваць з колькасцю афіцыйных паведамленняў пра выбары*-2024 па-расейску на тых жа сайтах (ад 50 да 170 паведамленняў, у залежнасці ад выканкаму).

А 14 сайтаў райвыканкамаў вобласці зусім не змяшчаюць афіцыйных паведамленняў па-беларуску пра выбары 25 лютага 2024. Гэта берасцейскі, баранавіцкі, бярозаўскі, ганцавіцкі, драгічынскі, жабінкоўскі, іванаўскі, івацэвіцкі, камянецкі, кобрынскі, ляхавіцкі, маларыцкі, пінскі, пружанскі райвыканкамы.

Сумная статыстыка да Міжнароднага Дня роднай мовы (святкуецца 21 лютага).