Добрая навіна: збор на BySOL для мужчыны з Берасцейскай вобласці паспяхова закрыты
Мікалай* (імя зменена) сядзіць у СІЗА і чакае суду па «справе Гаюна».
«Справа Гаюна» — масавая рэпрэсіўная крымінальная справа супраць людзей, якія з лютага 2022 года паведамлялі пра перасоўванне расейскіх войск па беларускай тэрыторыі ў ініцыятыву «Беларускі Гаюн».
«Хацеў, каб Украіна ведала пра перамяшчэнні войск [па беларускай тэрыторыі] і была гатовая. Каб людзі маглі ратавацца ад прылётаў ракет». Так яго дачка апісвае, чаму Мікалай дасылаў фота ў «Беларускі Гаюн».
З-за гэтага мужчыну затрымалі сёлета вясной і спачатку пагражалі тэрмінам у 15 гадоў калоніі. Потым артыкул змянілі (але на які — сям'я не ведае). Тым не менш, мужчына застаецца ў СІЗА і чакае суду. Сям'я разумее, што справядлівы (апраўдальны) прысуд не варта чакаць у сённяшніх умовах, і рыхтуюцца да доўгага зняволення свайго блізкага.
На адваката і перадачы для Мікалая 2 месяцы таму быў распачаты збор грошай. Шчэ тыдзень таму збору не хапала крыху больш за 300 еўра, але перад самым завяршэннем людзі дапамаглі, ды ўсё атрымалася.