На Вераніку Іванову, актывістку з Пінску, склалі чарговы пратакол. Гэтым разам падставай стаў допіс у сацсетцы «Instagram»:
Згодна з пратаколам, 6 лістапада 2022 года Вераніка Георгіеўна «выклала фотаздымак, на якім адлюстаравана экіпіроўка вайскоўца з вадзяным знакам у ніжнім левым кутку, назвай тэлеграм-каналу @belwarriors (Полк Каліноўскага), які рашэннем МУС Беларусі ад 23.09.2022 прызнаны экстрэмісцкім фармаваннем, такім чынам распазсюдзіла інфармацыйную прадукцыю, якая прапагандуе экстрэмісцкую дзейнасць».
Сама Іванова ў сваіх сацсетках паведаміла, што адпаведны суд адбудзецца 10.01.2023.
Нагадаем, што Вераніку Іванову пасля выбараў 2020 года неаднаразова затрымлівалі ды судзілі па «палітычных» адміністрацыйных справах.
