| Глядзі, пачуй, прабач Глядзі, вярнуўся я з турмы. Там зведаў краты, кайданы, — Вар’яцтва тамашняй гурмы… Вярнуўся нібыта з вайны. Прабач, вярнуўся я з турмы. Даруй мне гэту недарэчнасць. Як быццам там адбыў я вечнасць. Вярнуўся нібыта з вайны… Дзівісь, вярнуўся я з турмы. І сіл маіх не надта многа, Бадай, што страціў веру ў Бога! Вярнуўся нібыта з вайны. Пачуй, вярнуўся я з вайны… Сварыся, лайся сколь заўгодна. Ды й толькі прытулі лагодна Бо сёння я прыйшоў з турмы… Вярнуўся сёння я з вайны. 2023, Варшава |
Зачапілась воблачка
За крыжы царквы.
І паснула любая
На маім плячы.
Заўтра будзе сонейка,
А цяпер дажджы,
Вось таму каханая
Проста ціха сні.
Сні пра птушак і пра вёску,
Дзе жылі твае бацькі,
І пра то як на узгорку
Размаўлялі аб жыцці.
Як з надзеяй сустракалі
Цяплыню вясны,
І як мурашы здзіўлялі
Ў гушчары лясным.
На прыпынку як збіраўся
У гурму народ,
І — на ганку як чакалі
Зорны карагод.
У хаце ціш і цяплыня,
Трэшчаць дровы у пячы.
І паснула любая
На маім плячы.
Заўтра будзе сонейка
А цяпер імжа.
Стамілася каханая —
Буду спаць і я.
Мне лісты твае патрэбны —
Сказы, словы, думкі, мроі, —
Каб праз моры-акіяны
Весці мне па хвалях човен.
Каб пазбегнуць мрокаў сполах
І за зьзяючаю зоркай
Я да той старонкі роднай
Шлях пракласці змог па хвалях.
А яшчэ твае каханне,
Каб стрымаць я здолеў ліха,
І да дому павяртанне
Скончыў я ў бухце ціхай.
Бабруйская калонія
Жыццё маё скразная му́ка,
Але не стану я шукаць сука́....
І хоць за плотам брэша су́ка,
Лёс жэрнаў меле, сыплецца мука́.
Бабруйская калонія
Каханне...
Яно як танец на цьвіках.
У ім пакуты, жэст і слёзы на вачах,
Расчараванне...
Бабруйская калонія
Беларусь!
Як прасцінай белага лою
Снег пакрыў па узгорках палі.
Я цябе запрашаю з сабою
Паглядзець, як вандруюць зубры.
Вунь яны капытом уздымаюць
Па узлеску сувой снегавы.
І як нібыта нас заклікаюць
У ту казку з часоў даўніны.
Мажліва там, сярод Пушчанскіх зёлак,
Асілка позірк ды й сустрэнеш ты,
Праз зрэнкі зразумееш веліч зорак
Ад тых вякоў, што пражылі дзяды.
Тады абудзяць продкаў мроі
Душу і сэрца да жыцця.
І покліч зь нетраў роднай мовы
Пачуеш зь вуснаў дзецюка!
19.01.2022, бабруйская калонія
Жніво
Паглядзіце, ў Берасці
Чэргі ля СІЗА —
Натварыла нейкая
Гадота-грамада.
"Прастытуткі" розныя
Танчаць карагоды —
І з таго краіна ўся
Стала з ног на рогі.
Вось зямную здзьвінулі
Гэткія брыдоты,
І таму АМАПаўцам
Час не да сумоты.
"Наркаманы"-сволачы
Боты паздымалі,
І нагамі босымі
На лаву паўставалі.
Зноў сцягамі гойдаюць —
Нікчэмныя скаты.
А чаго чакаць яшчэ
Ад гэтай сраматы.
Толькі вось са сховішча
Прыгналі вадамёты,
Амаль што не паставілі
На дахах кулямёты.
"Красаўчыкі" наўвогул
"Любят свой народ":
Будуць ведаць, сволачы,
Як танчыць карагод...
Стаяць людзі з торбамі
Ў чэргах ля СІЗА.
Адбыліся выбары —
Стогне грамада...
Берасцейскае СІЗА
ГУЛАГ
ГУЛАГ — Галоўная Управа Лукашэнкі Аляксандра Грыгор'явіча
Стаялі судзі на кафізме,
Стаяў і я чакаючы прысуд,
Сыны сіманіі* — адроддзе трызны,
Пакон** нагадваў шлях пакут.
Пакуль адэпт драпежнага хаўрусу
Кіруе жэрнавам млына
Не будзе шчасця беларусу
Ды й з млына будзе цеч крывя.
Вось і сяджу на кукішках ў прадоле
І прагну думку маю я:
Я беларус і мая доля —
Трымаць пакуты ўся жыцця.
Але шмат часу не мінецца
І ўбачу я паходні свет.
Бо на мяжы ўжо коні мнкнуцца,
Каб здзейсніць продкаў запавет.
Таму сяджу на кукішках ў прадоле,
Бо сын сваёй радзімы я:
— Я Беларус! І я не згодны
Трымаць пакуты ўся жыцця!
* Сімантыя — сярэднявеччы орден, першыя гандляры індульгенцыямі.
** Пакон — старабеларускае слова, прадвыкананне закону.
20.06.2022 (100 дзён да вызвалення)
Ніколі я не разумеў,
Як жадана птушка з волі,
Што у дзюбцы прынясе
Той канверт хвалёўны…
Берасцейскае СІЗА №7. Першы верш
Мы ўзрослі ўсе
Сярод ахвяр і катаў.
Адзін пісаў — другі сядзеў
Да нас не дзіўна жыці разам
Той лагер зваўся СССР.
Бабруйская калонія
Пасля патрабавання Д. Шынвізэ прамаўляць рапарт па-руску
Праз нямы ор жыву ў сусвеце,
Ажно на сэрцы боль і жах,
Што ў сваёй радзіме я ўжо павінен весці
Па-руску справаздачу пры панах...
Бабруйская калонія
Жыву ў краіне для жыцця
Квітнеючай па-над дрыгвамі.
Там погляд кінь на далягляд,
Каб выглядаў адзіны лад,
Усё абнесена дратамі.
І выйсця болей мне няма
Як жыць у краіне для жыцця...
За тыдзень да вызвалення. Бабруйская калонія
Апублікавана 28.10.2025
Выкарыстаныя выявы:
1. euroradio.fm
2. Калаж берасейскай Вясны
3. region.brest-belarus.org/pruzh
4. wirestock / freepik.com
5. tut.by
6. Mateus Andre / freepik.com
